පරිසරය රැක ගනිමින් මතු පරපුර වෙනුවෙන් එය සුරක්ෂිතව දායාද කිරීමට රජය ගෙන යන වැඩපිළිවෙල සමඟ එක්වෙමින් තම වගකීම් සහ යුතුකම් නිසි ලෙස ඉටු කිරීම සියලූ නිලධාරින්ගේ වගකීමක් බව ජනපති අවධාරණය කරයි.
ජනාධිපති ගරු මෛත්‍රීපාල සිරිසේන මැතිතුමා මේ බව අවධාරණය කළේ අද (28) පෙරවරුවේ බත්තරමුල්ල, මධ්‍යම පරිසර අධිකාරි ශ්‍රවණාගාරයේ පැවති මධ්‍යම පරිසර අධිකාරියේ ප්‍රාදේශීය පරිසර නිලධාරි සංගමයේ 17 වන වාර්ෂික මහා සමුළුව අමතමිනි.
මෙම යුගය පරිසරය නොසළකා හරින පිරිස් සම්බන්ධයෙන් දැඩි අවධානයකින් කටයුතු කළයුතු යුගයක් බව ද මෙහිදී පෙන්වා දුන් ජනාධිපතිතුමා පරිසර සංරක්ෂණයට පටහැනිව නීතිවිරෝධීව කටයුතු කරන පිරිස්වලට එරෙහිව දැඩිව නීතිය ක්‍රියාත්මක කිරීම නිළධාරින්ගේ වගකීමක් බව ද අවධාරණය කළේය.
යම් ප්‍රදේශයක පරිසර විනාශයන්ට ඉඩ තබනවානම් එය එම ප්‍රදේශයේ පොලිසිය, ප්‍රාදේශිය ලේකම් ඇතුළු පරිසර නිළධාරින්ගේ වගකීම් පිලිබඳ ගැටලූවක් බව ද පැවසූ ජනාධිපතිතුමා පරිසර විනාශයට එරෙහිව රජය ගෙන යන දැඩි වැඩපිළිවෙල සමඟ එක්වෙමින් පරිසරය රැක ගැනීම සඳහා සිය වගකීම නිසි ලෙස ඉටු කිරීමට සියලූ නිළධාරින් කැපවිය යුතු බවද අවධාරණය කළේය.
පරිසර අමාත්‍යවරයා ලෙස තමා දිවයිනේ පළමු වතාවට පරිසරය ආරක්ෂා කර ගැනීම සඳහා ත්‍රිවිධ හමුදාවේ දායකත්වය ලබාගෙන තිබෙන බව ද ජනාධිපතිතුමා මෙහිදී සිහිපත් කළේය.
ප්‍රාදේශීය පරිසර නිළධාරි සංගමයේ යෝජනා සහ ඉල්ලීම් ඇතුළත් සංදේශයක් ද ප්‍රාදේශීය පරිසර නිලධාරී සංගමයේ සභාපති අමරජයන්ත මහතා විසින් ජනාධිපතිතුමා වෙත භාර දුන්නේය.
මහවැලි සංවර්ධන හා පරිසර අමාත්‍යාංශයේ ලේකම් උදය ආර්. සෙනෙවිරත්න, මධ්‍යම පරිසර අධිකාරියේ සභාපති මහාචාර්ය ලාල් මර්වින් ධර්මසිරි, මධ්‍යම පරිසර අධිකාරියේ අධ්‍යක්ෂ ජනරාල් කේ.එච්. මුතුකුඩආරච්චි යන මහත්වරුන් සහ ප්‍රාදේශීය පරිසර නිලධාරි සංගමයේ සාමාජිකයින් මෙම අවස්ථාවට එක්ව සිටියහ.
