සංචාරක ඉන්දීය පිලට එරෙහිව මීර්පූර් හී පැවැති තුන්වැනි හා අවසන් එක්දින තරගයෙන් කඩුලු 6ක ජයක් ලබා ඉන්දියාවට එරෙහිව පළමු එක්දින තරගාවලි ජය වාර්තා කිරීම පිළිබඳ බංග්ලාදේශ ක්‍රිකට් නායක මෂ්රාෆි මොර්ටසා පුහුණුකරු චන්දික හතුරුසිංහට එහි ගෞරවය හිමිවිය යුතු බව කියා සිටියේය.
'ආක්‍රමණශීලී ලෙස ක්‍රීඩා කිරීම තරම් ජයග්‍රහණයට ඉවහල් වන තවත් කරුණක් නොමැති බව පුහුණුකරු හතුරුසිංහ අපට කියා දුන්නේ පසුගිය ලෝක කුසලාන තරගාමාලාවේ සිටයි.
දැන් අපේ ක්‍රීඩකයන් කිසිදු බියක් නොමැතිව ක්‍රීඩා කරනවා. එහි ප්‍රතිඵල තමයි මේ.' ඉන්දියාවට එරෙහිව ලැබූ ඓතිහාසික ජයග්‍රහණයෙන් පසුව මොර්ටසා කීවේය.
'ක්‍රිකට් යනු මනස මෙහෙයවමින් කරන ක්‍රීඩාවක් බවත්, කිසිදු දෙගිඩියාවකින් තොරව පන්දුවට පහරදීමෙන් හා පන්දු යැවීමෙන් ජයග්‍රහණයේ මාවත විවර කෙරෙන බවත් ඔහු අපට කියා දුන්නා.' මොර්ටසා සිය පුහුණුකරු චන්දික හතුරුසිංහට ස්තූතිය පළකරමින් පැවැසීය.
මේ ජයග්‍රහණයත් සමග බංග්ලාදේශය වසර 2017 පැවැත්වෙන චැම්පියන් ශූරතාවලිය සඳහා සුදුසුකම් ලබාගැනිමට ද සමත්විය.