ජනපති ‘බ්ලූ රිජ්’ නෞකාවේ නිරීක්ෂණ චාරිකාවක
ශ්‍රී ලංකාව සහ අමෙරිකාව අතර සුහදතාව වර්ධනය කර ගැනීමේ අරමුණින් කොළඹ වරායට පැමිණ තිබෙන අමෙරිකානු නාවික හමුදාවට අයත් බ්ලූ රිජ් (Blue Ridge) නෞකාවේ නිරික්ෂණ චාරිකාවක නිරත වීමට ජනාධිපති මෛත්‍රීපාල සිරිසේන මහතා ඊයේ (28) පෙරවරුවේ පැමිණියේය. නෞකාවට පැමිණි ජනාධිපතිතුමා අමෙරිකානු නාවික හමුදාව විසින් හමුදා උත්තමාචාර සහිතව ඉතා ගෞරවයෙන් යුතුව පිළිගත්තේ ය. බ්ලූ රිජ් නෞකාව දින පහක සංචාරයකට කොළඹ වරායට පැමිණ තිඛෙන අතර 2011 වසරේ ඔක්තෝබර් මාසයෙන් පසුව අමෙරිකානු නාවික හමුදාවට අයත් නෞකාවක් මෙරටට පැමිණි පළමු අවස්ථාව මෙය වේ.
බෙදුණු ජාතියක් වශයෙන් නොව සියලු ජාතින් සමග එක්ව අනාගතයට මුහුණ දිය යුතු බවද රටේ ඉතිහාසයත් සංස්කෘතියත් තේරුම්‍ ගෙන බෙදුණු රට නැවත එක් කිරීමට එක් විය යුතු බවද අග්‍රාමාත්‍ය රනිල් වික්‍රමසිංහ මහතා පැවසීය. යම්කිසි අයෙකුට වැඩියෙන් බෙදා වැඩිපුර සැලකිය යුතුද යන්න තීරණය කළ යුත්තේ මේ රටේ ජනතාව බවද අගමැති රනිල් වික්‍රමසිංහ මහතා කීය. 
දිවයිනේ උතුරු, උතුරු මැද, නැගෙනහිර, ඌව සහ දකුණු පළාත්වල වැසි වාර කිහිපයක් ඇති විය හැකි බව කාලගුණ විද්‍යා දෙපාර්තමේන්තුව පවසයි. 
රජයේ ආදායම් මට්ටම ලබන වසර තුන තුළ දී දළ ජාතික ආදායමෙන් සියයට 13ක් දක්වා වැඩි කිරීමට රජය ක්‍රියාකරන බව සංවර්ධන උපායමාර්ගික හා ජාත්‍යන්තර වෙළෙඳාම පිළිබඳ අමාත්‍ය මලික් සමරවික්‍රම මහතා කියයි. 
අධිකරණයට බලපෑම් ඇති කරන ආකාරයට විනිසුරුවන්ගේ නිවාස ඉදිරිපිට පෝස්ටර් ගැසූ පුද්ගලයන් පිළිබඳ සොයා බලා ඔවුන්ට එරෙහිව නීතිය තදින්ම ක්‍රියාත්මක කරන ලෙස ජනාධිපති මෛත්‍රීපාල සිරිසේන මහතා ආරක්ෂක බලධාරින්ට උපදෙස් ලබාදී තිබේ.පෝස්ටර් ගැසූ පුද්ගලයන් කවුරුන්දැයි හරියාකාරව සොයා බැලීමට කටයුතු කරන ලෙස රාජ්‍ය බුද්ධි අංශ හා අනෙකුත් ආරක්ෂක අංශ වෙත ජනාධිපතිවරයා උපදෙස් දී ඇත. 
ශ්‍රී ලංකා මුස්ලිම් කොංග්‍රසයේ ජාතික සමුළුව ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් කල්මුණේ ක්‍රීඩාංගණයේදී පැවැත්විණි. එම අවස්ථාවට අගමැති රනිල් වික්‍රමසිංහ මහතා මු. කො. නායක රාහුෆ් හකීම්, විපක්ෂනායක ආර්. සම්බන්ධන් අමාත්‍ය ෆීල්ඩ් මාෂල් සරත් ෆොන්සේකා යන මහත්වරුන් ජනතාවට ආචාර කළ අයුරු. ඡායාරූපය - සුදත් මලවීර
රටේ ජනතාව නිදහස භුක්ති විඳින ආකාරය විරෝධතා , පෙළ පාළි, සහ රැස්වීම්වලින් තහවුරු වන බවත් ඒවා මෙහෙයවන නායකයන් සුදු වෑන් යවා අතුරුදහන් කරවීම අලුත් ආණ්ඩුවේ ප්‍රතිපත්තිය නොවන බවත් ජනාධිපති මෛත්‍රීපාල සිරිසේන මහතා ප්‍රකාශ කළේය.