දෙස් විදෙස් සංචාරක ආකර්ෂණය දිනා ගනිමින් ශ්‍රී ලංකාවේ දෙවැනි සත්ව උද්‍යානය මෙන්ම පළමු එළිමහන් සත්ව උද්‍යානය පින්නවල දී අද (17) විවෘත කෙරේ. පින්නවල අලි අනාථාගාරයට යාබදව අක්කර 44ක භූමිභාගයක් පුරා ඉදිරිකර තිබෙන මේ සත්ව උද්‍යානයේ ඉදිකිරීම් කටයුතු වෙනුවෙන් වැයකර තිබෙන මුදල රුපියල් මිලියන 862කි. එයින් රුපියල් මිලියන 488ක් මහා භාණ්ඩාගාරයෙන් වන අතර ඉතිරිය ශ්‍රී ලංකා සත්ව උද්‍යාන දෙපාර්තමේන්තුවෙන් බව සංචාරක හා ක්‍රීඩා අමාත්‍යාංශය පවසයි.
මැතිවරණ ප්‍රතිසංස්කරණය සඳහා වූ යෝජනා ලබන සතියේ කැබිනට් මණ්ඩලයට ඉදිරිපත් කර ඒ සඳහා අනුමැතිය ලබාගැනීමට නියමිතව ඇතැයි රජයේ ආරංචි මාර්ග සඳහන් කරයි.
ඉන්දියාවේ බුද්ධගයාවේ හි පිහිටි බෝධීන් වහන්සේ යහපත් සෞඛ්‍ය තත්ත්වයකින් පවතින බවට ඒ සම්බන්ධයෙන් සිදුකළ පර්යේෂණයකින් අනාවරණය කරගෙන ඇත.
දැනට පුරප්පාඩු වී පවතින තනාපති සේවයේ තනතුරු කඩිනමින් පිරවීමට පියවර ගෙන තිබෙන බව විදේශ කටයුතු අමාත්‍යංශය පවසයි.
රාජ්‍ය පාලන තන්ත්‍රයේ සහ රටේ පොදු යහපත වෙනුවෙන් ඉදිරිපත් කිරීමට යෝජිත දහනව වැනි ආණ්ඩුක්‍රම ව්‍යවස්ථා සංශෝධනය හරහා කිසිදු ආකාරයකින් රට අස්ථාවර නොවන බව විදේශ කටයුතු නියෝජ්‍ය ඇමැති නීතීඥ අජිත් පී. පෙරේරා මහතා අවධාරණය කරයි. මේ හරහා අවම විධායක බලතල සහිත ජනාධිපතිවරයකු යටතේ පාර්ලිමේන්තුව ශක්තිමත් වන බව පෙන්වාදෙන නියෝජ්‍ය ඇමැතිවරයා ඒ තුළන් අගමැතිවරයා ශක්තිමත් වනවා යනු මිථ්‍යාවක් බවද අගමැතිවරයා යනු තනි මතයට කටයුතු කළ නොහැකි ඇමැති මණ්ඩලයේම සමාන පුද්ගලයන් අතර ප්‍රමුඛයකු බවද කියාසිටී.
ජනතාවට අවුරුදු ජයටම සමරන්න ඉඩ ලැබී ඇතැයි අගමැති කියයි
වසර ගණනාවකට පසු ප්‍රථම වතාවට මාර්තු මාසයේ ජීවන වියදම අඩු වී ඇතැයිද රජය ලබා දුන් සහන භුක්ති විඳිමින් ජනතාට මෙවර හොඳ අලුත් අවුරුද්දක් සැමරීමේ අවස්ථාව උදා වී ඇතැයිද අග්‍රාමාත්‍ය රනිල් වික්‍රමසිංහ මහතා පැවසිය.
ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් පැවැති ශ්‍රී ලංකා නිදහස් පක්ෂයේ පාර්ලිමේන්තු කණ්ඩායම් රැස්වීමේදී 19වැනි ව්‍යවස්ථා සංශෝධනය සහ නව මැතිවරණ ක්‍රමයක් පිළිබඳව නව කෙටුම්පතක් සකස් කිරීම සඳහා පත් කළ හත් දෙනකුගෙන් සමන්විත කමිටුවේ සභාපති ධුරය මහාචාර්ය ජී. එල්. පීරිස් මහතාට ලබා දී තිබේ.
19වෙනි ආණ්ඩු ක්‍රම ව්‍යවස්ථා සංශෝධනය සඳහා වූ ඉදිරි කටයුතු සඳහා පත් කර ඇති මෙම කමිටුවේ සෙසු සාමාජිකයින් වන්නේ ශ්‍රීලනිප ජ්‍යෙෂ්ඨ උප සභාපති නිමල් සිරිපාල ද සිල්වා, ශ්‍රීලනිප මහ ලේකම් අනුර ප්‍රියදර්ශන යාපා, ශ්‍රීලනිප ජාතික සංවිධායක සුසිල් ප්‍රේමජයන්ත, ශ්‍රීලනිප මාධ්‍ය ප්‍රකාශක ඩිලාන් පෙරේරා, පාර්ලිමේන්තු මන්ත්‍රී මහින්ද සමරසිංහ සහ අමාත්‍ය එස්. බී. දිසානායක යන මහත්වරුන්ය.